Povitr Pustokantlo sondex dita
Tuzo uzvo dollo tuka patok korunk oddun vhorta zalear, to umttun kadd ani bhair uddoi, kiteak tuji akh'khi kudd iemkonddant uddoun gheunche poros, tujea ekach sandeacho nas zal'lo tuka odik borem. (Mt. 5: 29). Povitr Pustokantlea hea utrancher Komedian John D'Silvan aplo novo tiatr 'Devull' boroun machier haddla.
Mon’xachea kallzant duddvanchi axea rigtoch, to eke bhaxen kudd'ddo zata ani uprant to vaitt kornni adharun, patkant poddta, somazant dusreanche nodrek ek khuni zaunk pavta mhonn 'Devull' tiatrant spoxttponnim polleunk mellta. Survek Perry (Ignatius de Xelvona), aplea ixtta koddlean chear lakh rupia gheta tednam, itle sogott poixe poilech pavtt polleun to sarkoch piso zata. Aplea ixttacho khun kelear te soglle poixe apleache zatole mhonn to chinta ani tacho khun korta. Punn to khun adartana ek vattsur Perryk polleta ani tabortob pulisek kolloita. Pulis Inspektor (Xavier) taka rokddoch koidi korta ani tea khunak lagon taka boroch kall bondkhonn favo zata.
Vaitt chintnam monant golloun, vaitt adarche adinch borem chintun, boreo kornneo adarloleo zalear faido aslo mhonn pulis Inspektor (Aplon) taka bonddkhonnint sangta.
Dusre vatten, Britto Travasso (Joe) hachea kuttumbant tacho ekloch put Ryan (Peter de Pedda) kudd'ddo zolmota. Kudd'ddo ason-ui igorjek sodamkal bhett diun, Misant vantto gheun, gayonam gavun, Aitara disa bhurgeank dotorn' xikoun, aplo put dusreank ek nomuno ani bori vatt dakoita mhonn tacho bapui khup sontosta. Ria (Rosy) tea ganvchi bhoinn tachi thoknnai korta ani goroz tednam tem taka adar dita.
Aplea dolleamni apleak patkant ghalo dekun Perry bondkhonnint khup dukhi zata ani thoimsor khast bhogche bodlek aple patki dolle umttaun uddoilear odik borem mhonn to somzota. Bondkhonnint aple dolle kaddunk proyotn kortana, Pulis Inspektor taka addaita ani tech dolle eka kudd'ddeak dilear odik faideache mhonn tem tea opradheak sangta. Xevttim kudd'ddea Ryanak Perryche dolle favo zatat. Punn zolmak thavn ailolem kudd'ddeponn nopoit zatoch, Ryan Devak sompeponnim visorta ani vaittovem jivit jieyonk lagta. Gharant vonttir umkolltolem Jezuchem chitr bhair uddoun, tea zagear ek pozddem chitr to ubarta ani patkant poddta. Mezar aslolem Povitr Pustok store room-ant uddoun, tea zagear cholchitranchim pustokam to haddun dovorta. Ghara bhair mell'lolem Povitr Pustok ubarun, tem pustok kitlem povitr ani xoktivont tem xezari Braz (Komedian John) Ryan ani tachea bapaik sangta. Apleak atam soroll dista dekun, Ryan igorjechi vatt soddun, dis-rat parttiank bhonvta. Hanga-thoim cheddvam borobor mouza marta ani gharant Povitr Pustok vachunk sud'dam taka vitt ieta. Xevottak aple dolle dusreak bhettoun kudd'ddo zal'lo Perry somzant konn zaunk pavta ani dusreache dolle gheun sonvsaracho uzvadd polletolo Ryan konn zata, kel'le chukik taka kosli khast favo zata tem nimannea porddeant bhes-bore toren dakoilolem asa. Kudd'ddo asun, borem ani xegunni jivit jiyelear odik borem ani faideachem mhonn John D'Silva aplea tiatrantlean ek boro sondex loka meren pavoita. Vinodha babtint, komedian John aplea sangata komedian Michaelak lokak pottbhor hasoita. Kantaram vixim, Xavier Gomes-an gailolem 'Mon’xachem Kalliz' kantar, Ignatius de Xelvonachim 'Ixttagot' ani 'Tiatrist' kantaram lokak boro sondex ditalim. Aple dakovnnentlean Povitr Pustokantlo sondex loka meren pavunk John D'Silvan bhes boro proyotn kela ani Povitr Pustok kitlem bollvont ani xoktivont tem tannem dakoll kelam. Hea tachea proyotn-ak taka xabaski favo ani fuddarak-ui osle dekhivont tiatr machier haddun, lokak Deva thaim oddunk V. Ixtt John D'Silva-k borem ies anvddeta.
Digdorspi uloita:
® Konknni palkar ho mhozo 26vo tiatr.
® Mhozo poiloch tiatr 'Vell' gheun, ek boroupi ani
digdorspi koso hanv machier choddlom. Paiche bhaxen put asunk xokona mhonn tea tiatrant hanvem dakoll kelem.
® Vegllench rup gheun, hanvem don 'experimental' tiatr 'Sokallim' ani 'Avesvor' machier haddle. Sahityacho (literature) orth somzotat tankanch te tiatr somzole ani avoddle.
® Vinchnnuke vellar, veg-vegllea pokxancher lokx ghalun ani kochreacho, IFFI-cho vixoi gheun hanvem
‘Xiddkavnni' tiatr machier dakoilo.
® Tiatrachi kotha kitli-i bori asum, punn boro sondex dilea bogor hanv mhoje tiatr machier kednach dakoina.
P. Agxekar
(V-Ixtt hanchea upkarant)
No comments:
Post a Comment